Hargeysa (SNN) – Fannaanada caanka ah ee Ikraan Jaamac Ismaaciil, ayaa ka xogwarantay taariikhdeeda fanka ilaa waqtigii ay ku soo biirtay.
Ikraan Jaamac oo iyada iyo koox kale oo fannaaniin ahi dhawaan ka soo laabteen dalka Djibouti oo ay kaga qaybgaleen maalinta Miyuusiga Adduunka oo ku beegnayd 20-kii June, ayaa waraysi ay siisay shabakada wararka ee SALAL NEWS, waxay si faahfaahsan ugaga warantay sooyaalkeeda taariikheed ee fanka maalintii ay bilowday ilaa waqtigan.
Waraysigaas oo uu Fannaanada ka qaaday weriye Cali Axmed Raabi (Cali-Seenyo) waxay ka xogwarantay siyaasibihii ay ku soo gashay fanka, waqtigii ay bilowday, cidii soo gacan qabatay iyo heesaha ay qaado kuway ugu jeceshahay.
Ikraan Jaamac waxay sheegtay in waqtigii ay fanka bilowday ay si weyn u soo gacan qabteen abwaano ay ka mid yihiin Maxamuud Cabdillaahi (sangub), Xasan Qowdhan, Maxamed Faarax, Cabdinaasir Macalin Caydiid, Cabdi Keyd, Maxamed Maxmuud Cige (Busi), Aadan Xuseen Cabdi (karoone), Xuseen Jaamac Rooble (Xaaji-Gujis), Maxamed Cabdi Xaashi (xuuro), Cabdi Iidaan Faarax iyo rag kale oo badan.
Fanaanada Ikraan Jaamac Ismaaciil ka hor intii aanay gudagalin xogwaranka fankeeda waxay carrabka ku dhufatay inay aad uga xun tahay imaatin la’aanta Hargeysa uu fooda soo gelin waayey Abwaanka Maxamuud Cabdillaahi (sangub) oo ay ku tilmaantay inuu aad ugu dadaalay oo guntiga dhiisha iskaga dhigay markii dagaaladu ka dhaceen Hargeysa 1988kii inuu Fanaaniin badan iyo dhalinyaro ka furtay ciidamadii Faqashta ee dowladii Siyaad Barre.
Hadaba Ikraan Jaamac Ismaaciil iyadoo ugu horeyn ka jawaabeysa halkii ay fanka ka bilowday iyo xiligii ay soo gashay fanka waxay tidhi; “Anigu waxan dhashay sannadkii 1972-kii anigoo ku dhashay Magaalada Hargeysa xaafadda Iftin, halkaas oo aan ku barbaaray, Dugsiga Axmed Gurey-na aan ka galay ilaa fasalkii sadexaad oo aan kaga tagay Dugsigii hoose waayo? Waxan aad u jeclaa oo hiwaayadeyduba ahayd heesaha fanka iyo miyuusiga, taas oo sabab u ahayd in aan mowjada fanka ku soo biro. Haddaan idiin xuso walaal heestii ugu horreysay ee aan masraxa ka qaado ama aan isu taago waxay ahayd heesta qaraamiga ah ee la yidhaa Jowhara Luula, oo runtii sabab u ahayd in kooxda Danan ay codkeygii iyo qaabkii aan miyuusiga u raacayey aad ula dhaceen dabeetana ay iga codsadeen in aan kooxdooda ka mid noqdo.”
Ikraan Jaamac Ismaaciil waxa kale oo uu waraysigeedaasi ku sheegay in markii ugu horreysay ee ay masrixiyadda isa soo taagto ka qayb gashay ruwaayad ay soo bandhigeen Kooxdii Danan Hargeysa taas oo magaceedu ahaa ‘War mahayside Adduun waa wager’ oo uu alifay Abwaanka Xasan Qowdhan. Wixii intaa ka dambeeyeyna wakhti kooban dabadeed hadana ay fanaanadu ruwaayadii labaad ka qayb gashey oo magaceedu ahaa ‘Anba ku ogiye maxaad la onkodi’ oo iyadana uu alifay Abwaankii Baandey, ruwaayadaas oo ay ku lahayd heeso kaalinta labaad ay iyadu jilaysey.
Waxa kale oo ay intaa ku dartey Ikraan Jaamac in ruwaayadaa ay laxamadeeda alifeen Cabdiraxmaan Dheere iyo Xaamud kaalin fiicana ay ku mutaysatey aadna ay u xiiseeyeen dadweynihii iyo Kooxdii Danan ee ay ku cusbeyd.
“Heesihii aan ku qaaday ruwaayadaas waxa ka mid ahaa ‘Ma haawala sheegnaa hoos ma isu eegnaa, howlaheena kala maqan hareeraha ma qabanaa baadida ma hoynaa geedigeena kala hadhay horseedkii halkuu maray haku soo hagaagee ma u haadinaa gacan,” ayey tidhi Ikraan Jaamac.
Fanaanada Ikraan Jaamac Ismaaciil iyadoo hadalkeeda sii wadata waxay tidhi, “Ruwaayadahaa isdaba joogay ayuu fankaygu jaran-jarada sare ku soo korey oo aan nasiib u helay waxa kale oo ruwaayadaa ii xigay oo aan haddana ka mid noqday fannaaniintii jilaysey, aniga ayaana ahaa xidigadii Ruwaayada oo hal darajo ayaan kor u kacay, markan waxanay ahayd Ruwaayadii la magac baxday ‘Calaf iyo nasiib’ oo uu alifay Xasan Qowdhan iyo Ruwaayadii kale ee ahayd ‘Gardiid waa alla diid’ oo uu alifay Jaamac Riyo, runtii waxan ku lahaa heeso qiimo badan oo aanan qaarkood ilaawi karayn, waxaana ka mid ahaa ‘Dabaal degii caashaqayga.”
Ikraan Jaamac mar ay ka waramaysa heesheeda qubanaha ah ee sida gaarka ah loogu alifay waxay xustay inay leedahay heeso badan oo ay ka mid yihiin ‘Gudi-Garasho’ oo uu alifay Abwaanka Maxamuud Cabdillaahi Sangub, laxankana uu ku ladhey Fannaankii Axmed Cali Cigaal, dadkuna waxay ku yaqaanaan ‘Jaceylkeygan gudhey godoba uma qabo.’
Waxa kale oo ay sheegtay ruwaayadaha ay ka qaybgashay ay ka mid ahaayeen Ruwaayadii ‘Aan furdaanshee furaha keen’ oo uu alifay Abwaankii Aw Kadleeye oo ay kaalin door ah ku laheyd heeso badana ka qaaday.
Ugu danbeyntiina waxay Fannaanada Ikraan Jaamac Ismaaciil xogwarankeeda ku soo gabagabeysay heesta ay ugu jeceshahay heesaheeda oo la yidhaa ‘Dunida adaan kaa helaa,’ oo uu alifay Afgooye ay dhallinyaro qurbaha joogaa ka soo daba qaadeen, arrintaas oo aanay ka raali ahayn, waxaanay ugu baaqday inay faraha kala baxaan.
Wareysiga oo aad u xiisa badan halka ka dhagayso..
Shiine Cilmi Kaahin - Hargeys
SALAL NEWS
|
Hees Cusub oo Loogu Talagalay Geb Secondary School Codkii Fanaanka Weyn Saliim Saciid Saliim
Wareysi Aanu La Yeelanay Wasiir-ku-xigeenka Waxbarashada iyo Tacliinta Sare Cali Xaamud Jibriil 
Wareysi Khaas ah oo aanu la yeelanay Gudoomiyaha Cusub Ee Gobolka Awdal Md:Maxamed Dahir Cabdalla.
.
Wareysi aanu La yeelanay Afhayeenka Xisbiga Kulmiye ee Gobolka Awdal Axmed Muxumad Dacar.
Wareysi aanu La yeelanay Gudoomiyaha Garabka Haweenka Xisbiga Kulmiye ee Gobolka Awdal Amaal Xaaji Axmed Miisaan 
Taariikh Nololedki Madaxweynaha Cusub Ee Somaliland Md:Axmed Maxamed Maxamud (Siilaanyo) 
Waraysi Aanu La Yeelanay Xog-hayaha Arrimaha dibada ee Kulmiye oo ka Waramay guusha Doorashada Somaliland.
Weriye Bashkas Jug soo dhacay Oo ka Waramay Doorashada Somaliland 
Wareysi Khaas ah oo aanu la yeelanayAbwaanka caanka ah ee Soomaaliyeed Maxamuud C/laahi Ciise(Sangub)Qaybtii 1 & 2.
Waraysi Khaasa : Ciyaartooy Xasan Waraabe Cade oo ka soo jeeda Somaliland oo ka mid ahaa Ciyaartooyadii Hore ee Soomaaliya. 
Waraysi aanu la yeelanay Gudoomiyaha Ururkan horumarita wadooyinka Awdal/Salal (ASARDA), Pro:Xasan Cali Cismaan
